R.I.P. WALLET

Nung unang panahon, nung nagtatrabaho pa ako sa Pinas, talagang pulahan na ang status ng buhay ng wallet ko nun. Tipong isang pitik nalang pwede nang ilibing. Ganun naman talaga dahil ganun talaga bigayan sa mga nurses sa Pinas (itaas ang sahod ng mga nurse! ano na?!). Tiyagaan lang para mag-experience at makapag-abroad. Swerte lang minsan pag may pa-duty tapos holiday, yun madalas kuha lang ako ng paduty lalo na kung di naman toxic, wala naman akong jowa nun kaya OT is life. Yun ang dahilan kaya nakakapagtabi pa ako minsan.

Dito sa UAE, ibang story naman. Kahit gaano kalaki ang sahod mo, kung paano mo i-handle ang pera mo dun nagkakatalo. Renta palang ng bahay dito patay na agad halos 1/3 ng sahod mo tapos karamihan eh mas malaki pa ang banyo kesa sa room mo mismo. Minsan nga maiisipan mong maglagay ng bed nalang sa banyo, mas maluwang na, di ka pa lalakad nang malayo pag naiihi ka. Kung sa pagkain naman, medyo mura dito tsaka kahit saan may grocery ka na makikita (wag mo lang iconvert sa peso). Sa ibang tao sapat na ang 500 dirhams na food allowance per month, may sobra pa kung madiskarte talaga.

Ang malakas pumatay ng wallet dito eh ang mga 24 hours a day, 7 days a week na sale sa mga malls or kahit sa mga tabi tabing tindahan lang. Yung iba legit na sale talaga, yung iba naman eh shunga lang ang maniniwalang sale. Uso din ang hulugan ng mga telecommunications company sa mga latest phones or gadgets na yearly lumalabas na hindi ko maintindihan kung bakit maraming mga taong gustong magpalit ng phone yearly. Yung sakin kung di lang nabasag ang screen di ko papalitan eh. Marami ding mga sale na damit dito na kahit sale eh mapapamura ka nalang pag nakita mo presyo. At marami pang iba na sadyang ginawa para ubusin laman ng wallet mo.

Maraming mga kabayan dito ang mga di nagpapahuli sa kung ano ang uso, tipong bili lang nang bili, wapakels sa presyo nandyan naman si credit card. Marami ding laki sa London (loan dito, loan doon) na sa huli eh nauuwi sa free accomodation (kulungan) pag singilan na. Ok lang naman mag-loan lalo na kung talagang may paggagamitan ka neto na sobrang importante, pero kung magloloan ka lang para makabili ng bagay na gusto mo at makapagyabang eh ayos yan tropa, basta walang sisihan sa huli. Marami nang nakulong din dito dahil sa mga problema sa credit cards at loans, sobrang daling magpa-approve ng loan dito pero ang hirap makalabas once na makapasok ka na. Ang masaklap na katotohanan, maraming mga kabayan dito ang dito na tumanda na walang naipundar na kahit ano kundi patong patong na utang. Yung tipong sa edad nila dapat retiro na sila sa trabaho at ine-enjoy ang buhay pero kabaligtaran ang nangyayari dahil sa utang na yan. Utang na yan talaga o.

Kaya kung isa ka sa mga kabayan dito sa UAE na mahilig gumala, bumili ng di naman kelangan, walwal is life, at buhay YOLO, mag-isip isip ka na. Sabi nga, enjoy now, suffer later. Baka pag nakita ka ng future self mo eh pektusan ka nang matindi dahil siya ang nagdudusa sa mga kashungahan mo nung bata ka pa. Tabi tabi din pag may sobra at ipon ipon din pag may time, malayo ang mararating nyan pramis. Tandaan mo ang Solid Financial Foundation na pinahapyawan ko sa previous blog ko kung wala kang idea kung paano i-handle ang pera mo. You're welcome.